今季鐵人賽事完滿結束

而家已是深秋時份，只有腦袋唔正常既人先至會去海灘游水。

尋日去左南灣比賽，海水真係好鬼凍，簡直就係冰水，我估海水溫度只有十幾度，身體一與海水接觸，唔係遇冷縮下縮下咁簡單，而係好似卡通畫面咁，成個人即刻冰晒硬晒，對身體循環機能同埋神志都有好大影響，0個一刻，係自己同自己既身體搏鬥，同旁人一d關係都冇。

而且清晨時份落水，真係好攞命。

如果唔係因為比賽，我係打死都唔會落水既，所以我真係好佩服日日去海灘晨運既公公婆婆，尋日見佢地游得不知幾咁疏乎，有d濕住個身仲著住泳衣係岸上行黎行去，真係好堅呀！


隨住尋日最後一場比賽結束，今季鐵人賽事已全部比晒勒，我真係全部完成晒，亦未試過畀人抬出比賽場地。

對我個人黎講，已經好唔簡單。

雖然無攞過獎，亦試過包尾添，但係每一場都學到唔同既野，從經驗中一點一滴咁學習係好開心既。

每一場都在某d方面有所進步，係最值得自己高興既地方。