藍山咖啡店...拯救了我

好耐之前就想來這家店，因為招牌實在太有型了——藍山咖啡專門店。

在全港最窮既深水埗區，點解會有呢間咁懶有型既咖啡店？是我一直都唔明白既地方。

好！今日我急需為自己打打氣，決定畀自己好過一d，亦趁機side track一下沮喪既心情......我來也！

一進門，有d愕然，得三張摺枱？唔係卦，咁草根feel既？

點左熱咖啡，先睇到頭頂既菜牌，原來咖啡都有十幾種，由巴西山度士到藍山咖啡...乜都有，才知道原來有咁多種咖啡，果然係「專門店」。

等待期間，郵差叔叔來派信，鄰座既伯伯因為家裡大掃除，留在此店與老闆娘談天，對面既嬸嬸又話剛洗完地咋，來這裡抖一抖，再來一位叔父客人，剛進店就同鄰座伯伯鬥咀...

看得出他們鄰里之間的情誼好到不得了...

對！這一刻，我最需要的就是這點人情味，我需要這種溫度。

即磨蒸餾咖啡送來，老闆娘細心地將牛奶用小小的保溫杯分開盛著，又有黃糖供應，連咖啡杯都一絲不苟。睇得出老闆娘在有限既資源中，盡量精益求精，誠意搭夠。

咖啡加即食通粉，盛惠$23，超值又溫馨...老闆娘，謝謝妳！

鳴謝：門口相要感謝某大食店搜尋引擎，食物相就感謝自己部手機啦，多謝樂姬啊！